शितल बाविस्कर राणेराजपूत आणि सौ संध्या परदेशी यांच्या साप्ताहिक काव्यलेखन स्पर्धेत Raksha Bandhan Marathi Kavita विषयावर रजिस्टर झालेल्या उत्कृष्ट कविता येथे वाचा.
Raksha Bandhan Marathi Kavita
अतुट बंधन | Raksha Bandhan Marathi Kavita
काव्य बंध समूह, काव्यलतिका
विषय :- रक्षाबंधन
दिनांक :- १७/८/२०२३
स्पर्धेसाठी
नाते भाऊ बहिणीचे
असे अतुट बंधन
आयुष्यात पेरतात
जिव्हाळ्याचे क्षण ||१||
बंध रेशमी धाग्याचे
प्रेम आणि आपुलकी
नाती जीवाभावाची
नाही होत कधी परकी ||२||
एकमेकांसाठी जीव
सदा कासावीस होतो
बहिणीच्या भेटीला
भाऊ पटकन धावतो ||३||
कधी रुसवा फुगवा
कधी अबोला क्षणाचा
बहिण भावाच्या नात्यात
क्षण असतो सौख्याचा ||४||
भाग्यवान असता जगी
माया मिळते बहिणीची
भावासाठी कष्ट करते
प्रेमळ मुर्ती कारुण्याची ||५||
निरपेक्ष असे तिचे प्रेम
नसे कधीच दुजाभाव
न सांगताही बहीण घेई
मनाचा अलगद ठाव ||६||
भाऊ बहीण नाते विलक्षण
ऋणानुबंध असती प्रेमाचे
साथ जशी द्रौपदी कृष्णाची
नाते ठरे भाग्य बंधनाचे ||७||
जगी सर्वश्रेष्ठ ठरले नाते
श्रीकृष्ण आणि द्रौपदीचे
धावून संकटकाळी ऋण
फेडले बांधलेल्या चिंधीचे ||८||
भाऊ बहिणीच्या नात्यात
असते आपुलकी नि माया
बहिणीच्या हृदयात असतो
ठायी ठायी तिचा भाऊराया ||९||
रक्षाबंधन सणाचा गोडवा
दोघांनाही जोडून ठेवतो
एकमेकांना भेटण्यासाठी
जीव तीळ तीळ तुटतो ||१०||
शितल बाविस्कर राणेराजपूत जळगाव
Raksha Bandhan Marathi Kavita
राखी पौर्णिमा | Raksha Bandhan Marathi Kavita
काव्यबंध समूह आयोजित काव्यलतिका स्पर्धेसाठी …
दिनांक १७/८/२०२३
विषय : रक्षाबंधन
हुरहुर वाटे बहिणीच्या मनात
येता माहेरची आठवण
आज आहे रक्षाबंधन
वाट पाहे भाबडे मन
राखी पौर्णिमेचा सण
करू धुमधडाक्यात सर्वजन
प्रेमाची गंगा वाहती ठेवू
बहिण भावाच्या नात्याची साठवण
ख्याती मध्ये ख्याती
माझ्या माहेरची माती
तेथे सुखाने नांदती
बहू धर्माच्या जाती
बहिण भावाचे प्रेम
आहे निर्मळ,पवित्र
रुसवा,फुगला काढीत
बालपणा पासून वाढलो एकत्र
रक्षाबंधनाचे धागे
आहे पवित्र बंधनांचे
दोघांनी मिळून जोपासावे
नाही कधी दुर जायाचे
ओवाळीते भाऊराया हृदय ज्योतीने
तुझ्याच साठी केला विडा
देतेय तुला मायेने श्रीफळ
आशिर्वाद माझा टळो सर्व इडा,पिडा
घर, दार,जमीन जुमला
वाटा नको इस्टेटमध्ये मजला
तु सदैव रक्षणाला धावत ये
हेच मागणे मागते तुजला
नको अंतर देऊ भाऊराया ह्या वेडया बहिणीला
वाट तुझी पाहते,प्राण कंठाशी आला
कधी येणार तू राखी सणाला
नकोच मजला पैसा, अडका
प्रार्थना करीते ईश्वर चरणी
तु यशवंत,गुणवंत व्हावे
हीच माझी राखीची ओवाळणी
अशीच राहू दे तुझी छत्र छाया
दि‌र्घायुष्य मागते लाडक्या भावाला
कृष्णाने जसे रक्षिले द्रोपदीला
तसेच मागणे मागते तुजला
सौ संध्या परदेशी औरंगाबाद
THE END
जर आपल्याला देखील कविता किंवा साहित्य लिहिण्याचा छंद असेल आणि आमच्या मासिक कविता स्पर्धांमध्ये तुम्हाला भाग घ्यायचा असेल तर आम्हाला नक्की कळवा. तुम्ही आम्हाला 7020965224 या नंबर वर Whats App करू शकता. किंवा खाली दिलेल्या लिंक वर क्लिक करून संपर्क साधू शकता.
नवनवीन साहित्य तुमच्या पर्यंत आणण्यासाठी आम्ही सदैव तत्पर असतो. मराठी भाषेचा ऱ्हास होऊ नये यासाठी तिचे लेखन, वाचन, मनन केले पाहिजे अशी आमची धारणा आहे. तुम्ही देखील या कार्यात सहभागी होऊ शकता.
आमच्या इतर कविता वाचा.
लग्न म्हणजे काय असते ?
लेकी साठी सुंदर चारोळ्या संग्रह